ხარტანი

ხარტანი
დისტრიბუტორი: ფარმაცევტული კომპანია "გეა"
მისამართი: ვაჟა ფშაველა № 6
ტელ: 238 47 66; 237 07 36
ელ-ფოსტა: info@gea.com.ge
ვებ-გვერდი: www.gea.com.ge
გამოყენებისას გაეცანით ინსტრუქციას, გვერდითი მოვლენების შესახებ დეტალური ინფორმაციის მისაღებად მიმართეთ ექიმს.
სავაჭრო სახელწოდება: ხარტანი
საერთაშორისო დასახელება (აქტიური ნივთიერება): LOSARTAN POTASSIUM
კლინიკურ-ფარმაკოლოგიური ჯგუფი: ანგოიტენზინ II-ის ინჰიბიტორი, ჰიპოტენზური საშუალება
მწარმოებელი: ადამედი (ADAMED Consumer Healthcare S.A. ( Polfa Pabianice))
მწარმოებელი ქვეყანა: პოლონეთი
გამოშვების ფორმა: 50მგ შემოგარსული ტაბლეტი №30
გაცემის რეჟიმი: II ჯგუფი, გაიცემა ფორმა №3 რეცეპტით
ინსტრუქცია

ათქ კლასიფიკაციის კოდი
C09CA01

შემადგენლობა და გამოშვების ფორმა
ტაბლეტები: შეფუთვაში 30 ც.

1 ტაბ.
ლოზარტან კალიუმი . . . . . . 50 მგ

დამხმარე ნივთიერებები: ლაქტოზა, მიკროკრისტალური ცელულოზა, კარბოქსიმეთილცელულოზა, მაგნიუმის სტეარატი, ჰიპრომელოზა, ლაქტოზას მონოჰიდრატი, ტიტანის დიოქსიდი, პოლიეთილენგლიკოლი 3000, ტრიაცეტინი, რკინის ოქსიდი წითელი (E172), რკინის ოქსიდი ყვითელი (E172)

კლინიკურ-ფარმაკოლოგიური ჯგუფი
ანგიოტენზინ II რეცეპტორების ანტაგონისტი.

ფარმაკოლოგიური თვისებები
ანგიოტენზინ II წარმოადგენს ძლიერ ვაზოკონსტრიქტორს, რენინ-ანგიოტენზინური სისტემის მთავარ აქტიურ ჰორმონს, აგრეთვე გადამწყვეტ პათოფიზიოლოგიურ რგოლს არტერიული ჰიპერტენზიის განვითარებაში. ლოზარტანი არის ანგიოტენზინ II-ის (AT1 ტიპის) რეცეპტორების ანტაგონისტი. ანგიოტენზინ II შერჩევითად უკავშირდება AT1 რეცეპტორებს, რომლებიც განლაგებულნი არიან სხვადასხვა ქსოვილებში (სისხლძარღვთა გლუვ-კუნთოვან ქსოვილში, თირკმელზედა ჯირკვალში, თირკმელში, გულში) და ასრულებს რამოდენიმე ძირითად ფუნქციას, ვაზოკონსტრიქციის და ალდოსტერონის გამოთავისუფლების ჩათვლით. ანგიოტენზინ II აგრეთვე ახდენს გლუვ-კუნთოვანი უჯრედების ზრდის სტიმულირებას. ლოზარტანი შერჩევითად უკავშირდება AT1 რეცეპტორებს, არ ახდენს ანგიოტენზინ-გარდამქმნელი ფერმენტის (აგფ) ინჰიბირებას, შესაბამისად არ ახდენს გავლენას ბრადიკინინის ტრანსფორმაციაზე.

ჩვენებები
– მაღალი არტერიული წნევის (ჰიპერტენზიის) მკურნალობა მოზრდილებში და ბავშვებში 6-წლიდან;
– თირკმლის დაცვა ჰიპერტენზიისა და 2 ტიპის დიაბეტის მქონე პაციენტებში, რომლებსაც ლაბორატორიულად დადასტურებული აქვთ თირკმლის ფუნქციის მოშლა და პროტეინურია >0.5 გ დღეში;
– გულის ქრონიკული უკმარისობის მქონე პაციენტების სამკურნალოდ, ანგიოტენზინ გარდამქმნელი ფერმენტის არაეფექტურობის შემთხვევაში;
– მაღალი არტერიული წნევისა და მარცხენა პარკუჭის ჰიპერტროფიის მქონე პაციენტებში ხარტანი ამცირებს ინსულტის განვითარების რისკს.

დოზირების რეჟიმი
პრეპარატი უნდა მიიღოთ ექიმის დანიშნულების შესაბამისად.
მაღალი არტერიული წნევის მქონე მოზრდილები: მკურნალობა ჩვეულებრივ იწყება 50 მგ ხარტანის მიღებით დღეში ერთხელ. არტერიული წნევის მაქსიმალურად დაწევის ეფექტი მიღწეული უნდა იყოს მკურნალობის დაწყებიდან 3-6 კვირის განმავლობაში. დოზა შეიძლება გაიზარდოს 100 მგ-მდე (ხარტანის 50 მგ ორი ტაბლეტი) დღეში ერთხელ.
გამოყენება ბავშვებსა და მოზარდებში (6-18 წლის): რეკომენდებული საწყისი დოზა 20-25 კგ წონის პაციენტებისათვის არის 25 მგ დღეში ერთხელ. კონკრეტულ შემთხვევებში, დოზა შეიძლება გაიზარდოს 50 მგ-მდე დღეში ერთხელ. დოზირების კორექცია უნდა მოხდეს არტერიული წნევის ცვლილებების შესაბამისად.
მოზრდილი პაციენტები მაღალი არტერიული წნევით და 2 ტიპი დიაბეტით: მკურნალობა ჩვეულებრივ იწყება 50 მგ ლოზარტანით დღეში ერთხელ. დოზა მოგვიანებით შეიძლება გაიზარდოს 100 მგ-მდე დღეში ერთხელ პაციენტის არტერიული წნევის პასუხის შესაბამისად.

ლოზარტანის მიღება შეიძლება არტერიული წნევის დამწევ სხვა პრეპარატებთან ერთად (მაგ. დიურეტიკები, კალციუმის არხის ბლოკატორები, ალფა- ან ბეტაადრენობლოკატორები და ცენტრალური მოქმედების საშუალებები), აგრეთვე ინსულინთან და სხვა ისეთ პრეპარატებთან ერთად, რომლებიც გამოიყენება სისხლში გლუკოზის დონის დასაწევად (მაგ. სულფონილშარდოვანები, გლიტაზონები და გლუკოზიდაზას ინჰიბიტორები).
მოზრდილი პაციენტები გულის უკმარისობით: მკურნალობა ჩვეულებრივ იწყება 12.5 მგ ლოზარტანით დღეში ერთხელ. ზოგადად, დოზა უნდა გაიზარდოს ეტაპობრივად (მაგ. 12.5 მგ დღეში პირველი კვირის განმავლობაში, 25 მგ დღეში მეორე კვირის განმავლობაში, 50 მგ დღეში მესამე კვირის განმავლობაში) შემანარჩუნებელ დოზამდე 50 მგ დღეში ერთხელ, პაციენტის მდგომარეობის მიხედვით.
გულის უკმარისობის მკურნალობისას ხარტანთან ერთად კომბინაციაში გამოიყენება დიურეტიკი და/ან დიგიტალისი და/ან ბეტა-ბლოკატორი.
დოზირება პაციენტთა სხვადასხვა ჯგუფებში: ექიმმა შეიძლება დანიშნოს უფრო დაბალი დოზა, განსაკუთრებით მკურნალობის დასაწყისში პაციენტებში, რომლებიც ღებულობენ დიურეზული საშუალებების მაღალ დოზებს , ასევე ღვიძლის უკმარისობის მქონე ან 75 წლის ზემოთ ასაკის პაციენტები. ხარტანის გამოყენება რეკომენდებული არ არის ღვიძლის მწვავე უკმარისობის მქონე პაციენტებში.
ხარტანის მიღება შეიძლება საკვებთან ერთად ან მის გარეშე.
თუ დაგავიწყდათ ხარტანის მიღება: დოზის გამოტოვების შემთხვევაში, შემდეგი დოზა მიიღება ჩვეულებრივ. გამოტოვებული დოზის კომპენსირებისათვის არ მიიღოთ ორმაგი დოზა.

გვერდითი მოვლენები
ალერგიული რეაქციები (გამონაყარი, ქავილი, სახის, ტუჩების, პირის ან ყელის შეშუპება, რამაც შეიძლება გამოიწვიოს ყლაპვის ან სუნთქვის გაძნელება).
პრეპარატების გვერდითი ეფექტები კლასიფიცირებულია შემდეგნაირად:
ძალიან ხშირი: ვლინდება 10-დან 1-ზე მეტ მომხმარებელში;
ხშირი: ვლინდება 100-დან 1-10 მომხმარებელში;
არახშირი: ვლინდება 1000-დან 1-10 მომხმარებელში;
იშვიათი: ვლინდება 10000-დან 1-10 მომხმარებელში;
ძალიან იშვიათი: ვლინდება 10000-დან 1-ზე ნაკლებ მომხმარებელში;
უცნობი სიხშირით: სიხშირის დადგენა შეუძლებელია არსებული მონაცემებიდან გამომდინარე.
ხშირი: თავბრუსხვევა, დაბალი არტერიული წნევა, სისუსტე, დაღლილობა, სისხლში შაქრის დაბალი შემცველობა (ჰიპოგლიკემია), სისხლში კალიუმის მაღალი შემცველობა (ჰიპერკალემია).
არახშირი: ძილიანობა, თავის ტკივილი, ძილის დარღვევები, გახშირებული გულისცემა, სტენოკარდია, ჰიპოტენზია (გულის მწვავე უკმარისობის ან დიურეტიკების მაღალი დოზებით მკურნალობაზე მყოფ პაციენტებში), დოზასთან დაკავშირებული ორთოსტატიური ეფექტები (ორთოსტატიული ჰიპოტენზია), ქოშინი (დისპნოე), მუცლის ტკივილი, ყაბზობა, დიარეა, გულისრევა, პირღებინება, ჭინჭრის გამონაყარი, ქავილი, გამონაყარი, ლოკალიზებული შესიება (შეშუპება).
იშვიათი: სისხლძარღვების ანთება (ვასკულიტი ჰენოხ-შონლეინის პურპურა), დაბუჟების ან ჩხვლეტის შეგრძნება (პარესთეზია), გონების დაკარგვა (სინკოპე), ფიბრილაცია, ინსულტი, ჰეპატიტის, სისხლში ალანინამინოტრანსფერაზას დონის მომატება, ჩვეულებრივ გადის მკურნალობის შეწყვეტისთანავე
უცნობი სიხშირით: ანემია, თრომბოციტოპენია, შაკიკი, ხველა, ღვიძლის ფუნქციის დარღვევები, კუნთების და სახსრების ტკივილი, თირკმლის ფუნქციის ცვლილებები (შეიძლება იყოს ცვალებადი თერაპიის შეწყვეტის შემდეგ), მათ შორის თირკმლის უკმარისობა, გრიპის მსგავსი სიმპტომები, სისხლში შარდოვანას დონის მომატება, გულის უკმარისობის მქონე პაციენტებში შრატისმიერი კრეატინინისა და კალიუმის მომატება, ბავშვებში გამოვლენილი გვერდითი ეფექტები მოზრდილებში გამოვლენილი ეფექტების ანალოგიურია.

უკუჩვენებები
– ჰიპერმგრძნობელობა ლოზარტანის ან ხარტანის რომელიმე სხვა კომპონენტის მიმართ;
– ღვიძლის ფუნქციის დარღვევა;
– ორსულობის პირველი ტრიმესტრი და ლაქტაციის პერიოდი.

ორსულობა და ლაქტაცია
ხარტანი რეკომენდებული არ არის ორსულობის პირველი 12 კვირის განმავლობაში და არ უნდა იქნას მიღებული ორსულობის მე-13 კვირიდან, ვინაიდან ორსულობის დროს პრეპარატის მიღებამ შეიძლება ავნოს ბავშვს.
დაგეგმილი ორსულობისას თერაპია უნდა შეიცვალოს შესაბამისი ალტერნატიული მკურნალობით.
ნებისმიერი პრეპარატის მიღებამდე მიმართეთ ექიმს.

განსაკუთრებული მითითებები
განსაკუთრებული სიფრთხილე არის საჭირო, როდესაც ხარტანი გამოიყენება შემდეგ შემთხვევებში:
– თუ წარსულში პაციენტს აღენიშნებოდა ანგიოშეშუპება (სახის, ტუჩების, ყელის და/ან ენის);
– თუ პაციენტს ხშირად აღენიშნება პირღებინება ან დიარეა, რაც იწვევს ორგანიზმიდან სითხის და/ან მარილის დაკარგვას;
– თუ პაციენტი იღებს დიურეტიკებს ან კვებით რაციონში შეზღუდულია მარილის რაოდენობა, რაც იწვევს ორგანიზმში სითხისა და მარილის დიდი ოდენობით დაკარგვას;
– თუ პაციენტს აღენიშნება თირკმლის სისხლძარღვების შევიწროვება, ბლოკადა ან თუ ცოტა ხნის წინ ჩატარებულია თირკმლის ტრანსპლანტაცია;
– თუ პაციენტს აღენიშნება გულის უკმარისობა თირკმლის უკმარისობით ან მის გარეშე ან იმავდროულად სიცოცხლისათვის საშიში არითმიები. განსაკუთრებული სიფრთხილის გამოჩენა არის საჭირო მაშინ, როდესაც იმავდროულად იღებს ბეტა-ბლოკატორებს;
– თუ პაციენტს აღენიშნება გულის სარქველთან ან გულის კუნთებთან დაკავშირებული პრობლემები;
– თუ პაციენტს აღენიშნება გულის კორონარული ან ცერებროვასკულარული დარღვევები;
– თუ აღენიშნება პირველადი ჰიპერალდოსტერონიზმი.
ავტომობილებისა და მექანიზმების მართვა: გამოკვლევები ავტომობილებისა და მექანიზმების მართვის უნარზე ეფექტების შესახებ არ ჩატარებულა. ხარტანი სავარაუდოდ გავლენას არ ახდენს ავტომობილებისა და მექანიზმების მართვის უნარზე. მიუხედავად ამისა, როგორც მაღალი არტერიული წნევის სამკურნალო სხვა პრეპარატების შემთხვევაში, ლოზარტანმა ზოგიერთ ადამიანში შეიძლება გამოიწვიოს თავბრუსხვევა ან ძილიანობა.

ჭარბი დოზირება
ხარტანის ჭარბი დოზით მიღების შემთხვევაში აუცილებელია ექიმის კონსულტაცია. ზედოზირების სიმპტომებია დაბალი არტერიული წნევა, გახშირებული გულისცემა, შესაძლოა შემცირებული გულისცემა.

სხვა წამლებთან ურთიერთქმედება
განსაკუთრებული სიფრთხილე არის საჭირო, როდესაც ხარტანთან ერთად გამოიყენება შემდეგი პრეპარატები:
– სხვა ანტიჰიპერტენზიული საშუალებები, ტრიციკლური ანტიდეპრესანტები, ანტიფსიქოტური საშუალებები, ბაკლოფენი, ამიფოსტინი.
– პრეპარატები, რომლებიც იწვევენ კალიუმის შეკავებას ან ზრდიან კალიუმის დონეებს (მაგ. კალიუმის დანამატები, კალიუმის მარილის შემცველები ან კალიუმდამზოგავი პრეპარატები, როგორიცაა ზოგიერთი დიურეტიკი (ამილორიდი, ტრიამტერენი, სპირონოლაქტონი).
– არასტეროიდული ანთების საწინააღმდეგო საშუალებები, როგორიცაა ინდომეტაცინი, მათ შორის COX-2 ინჰიბიტორები (პრეპარატები, რომლებიც ამცირებენ ანთებას და გამოიყენება ტკივილის მოსახსნელად), ვინაიდან მათ შეიძლება დააქვეითონ ლოზარტანის წნევის დამწევი ეფექტი.
– თირკმლის უკმარისობისას ამ პრეპარატების იმავდროულმა გამოყენებამ შეიძლება გამოიწვიოს თირკმლის ფუნქციის გაუარესება.
– ლითიუმის შემცველი პრეპარატები არ მიიღება ლოზარტანთან ერთად ექიმის მეთვალყურეობის გარეშე. შეიძლება საჭირო გახდეს სპეციალური სიფრთხილის ზომების მიღება (მაგ. სისხლის ანალიზები).

შენახვის პირობები და ვადა
პრეპარატი ინახება არა უმეტეს 25°C ტემპერატურაზე, ბავშვებისთვის მიუწვდომელ ადგილას.
ვარგისიანობის ვადა – 3 წელი.

აფთიაქიდან გაცემის პირობები:
პრეპარატი გაიცემა ექიმის რეცეპტით.